КУЛА – Одборнїки Скупштини општини (СО) Кула вчера розправяли о 19 точкох дньового шору, а медзи иншим, принєшена и Одлука о окончованю комуналних дїялносцох, Одлука о условийох и способе даваня до закупу дїловного простору, та одредзени одлуки вязани за социялни даваня.
Принєшена и нова Одлука о месних заєднїцох (МЗ), з хтору тераз дефиновани дїялносци шейсц МЗ на териториї општини, одредзене финансованє (з општинского буджету, самодоприносох, донацийох и окончованя власних роботох) як и число занятих. За МЗ Руски Керестур предвидзене финансованє секретара и єдного административного роботнїка, як и у векшини других МЗ.
Пременєни и сновательни акти комуналних подприємствох, медзи нїма и керестурского „Рускому”, а дата и согласносц на Програму дїлованя „Рускому” и Дому култури Руски Керестур за идуци рок.
На вчерайшей схадзки одборнїки принєсли и одлуку о висини своїх надополнєньох за участвованє у роботи орґанох СО, Општини и їх роботних целох, та так од початку идуцого рока мешачне надополнєнє одборнїкох будзе 14 000 динари, а члени Општинскей ради котри нє заняти у Општини 15 000 динари мешачно. Членом стаємних роботних целох котри нє заняти у орґанох Општини и у явних подприємствох и установох припада надополнєнє половки дньовнїци за службене путованє, а спомнутим припадаю и драгово трошки.