БЕОҐРАД – Од вчера та у наступних 10 дньох, на моци буду нови мири Влади Сербиї, принєшени пре зоперанє ширеня вируса корона, преноша медиї.
По 3. децембер роботни час погосцительних обєктох – ресторанох, кафичох, барох, клубох, як и тарґовинских центрох, театрох, кинох и других установох култури, будзе огранїчени по 18 годзин.
Предавальнї и други тарґовински обєкти буду робиц по 21 годзин.
Апатики, бензински станїци у окончованю дїялносци предаваня горива и погосцительни и други обєкти котри приноша єдзенє на адресу, можу робиц без огранїченя.
Обовязне и безусловне ношенє защитней маски у завартим, як и на отвореним просторе у ситуацийох дзе нє мож керовац людски контакт.
Од вчера ше строго контролує ношенє маскох у явним превозу, зоз огранїченьом максималного числа путнїкох у превозки на поли од предвидзеного.