НОВИ САД – На ютре, 12. мая, почина манифестация „Музеї Сербиї, дзешец днї од 10 до 10”, под час хторей на 140 локацийох ширцом Сербиї буду отримовани вистави, роботнї, проєкциї филмох, преподаваня и други провадзаци активносци. Тогорочна тема манифестациї то „Мой музей мой город”, а зоз задумку повязац локалну заєднїцу и музей.
За дзешец днї манифестациї безплатно годно нащивиц 80 музеї у 55-ох местох у Сербиї, наявене на конференциї за новинарох у Музею Городу Нового Саду. Покраїнски секретар за културу и явне информованє Славиша Ґруїч гварел же тота манифестация ище єден плус за Нови Сад, хтори ше кандидує за европску престолнїцу култури.
– У тих 10 дньох у Войводини буду отворени 23 вистави, ґу тому, буду орґанизовани рижни преподаваня, проєкциї филмох, змисти за дзеци у 14 городох и 30 установох, цо гутори же ше вше вецей институциї уключую до тей националней манифестациї – гварел ресорни секретар Ґруїч.
У манифестациї у Новим Садзе участвую Музей Войводини, Ґалерия Матици сербскей, Музей Городу Нового Саду, Музей сучасней уметносци Войводини, Спомин-збирка Павла Белянского, Ґалерия подобовей уметносци Дарунок-збирка Райка Мамузича, Покраїнаски завод за защиту природи, Покраїнаски завод за защиту памятнїкох култури, Архив Войводини, Завод за защиту памятнїкох Городу Нового Саду и Оддзелєнє САНУ, а програму манифестациї мож видзиц на сайту www.muzejisrbije.rs/archives/category/muzeji-novi-sad.
Покровителє манифестациї Министерство култури и информованя, Покраїнски секретарият за културу и явне информованє и Город Нови Сад.