ВЕРБАС – У Покраїнскей влади вчера, 20. децембра, заменїца предсидателя Општини Вербас Миляна Штулич подписала контракти по котрих Покраїнски секретарият за енерґетику, будовательство и транспорт видвоєл вецей як 3 милиони динари за реализованє трох проєктох у обласци инфраструктурного опреманя за потреби унапредзованя безпечносци у транспорту.
Компетентни секретарият видвоєл 2,6 милиони динари за реконструкцию шветлосних сиґналох на крижней драги улїчкох Ивана Милутиновича и Нєґошевей, покля Општина Вербас ма обовязку обезпечиц додатни 665 тисячи динари.
За проєкт поставяня двох дисплейох за меранє швидкосци у улїчки Данила Бойовича, Покраїнски секретарият за енерґетику, будовательство и транспорт обезпечел 400 тисячи динари, а з локалного буджету будзе видвоєне додатни 200 тисячи динари.
Треци контракт ше одноши на зредзованє пешацкого преходу у зони Основней школи ,,20. октобер”, за цо з буджету Покраїни видвоєне 478 тисячи динари, а Општина Вербас обезпечи додатни 120 тисячи.
– Совит за безпечносц транспорту Општини Вербас провадзи шицки можлївосци и понукнуца рижних конкурсох и з порихтану проєктну документацию глєда партнерох котри нам можу помогнуц же бизме унапредзовали безпечносц шицких учашнїкох у транспорту на наших драгох – визначела предсидателька Совиту за безпечносц транспорту Општини Вербас Миляна Штулич.