Основани Ушорйовацки одбор за кнїжку о Тамашовей творчосци

автор зам
858 Опатрене

НОВИ САД – Вчера, 20. октобра, у Заводзе за културу войводянских Руснацох конституовани Ушорйовацки одбор за будуцу кнїжку о поетскей, романескней и науковей творчосци академика Юлияна Тамаша, у хторим Микола Шанта, Микола М. Цап, Мелания Римар, Ивана Дудаш, др Янко Рамач, академик Милош Тешич, Перо Зубац, др Яков Кишюгас и др Владимир Кирда.

Як одлучене на схадзки, главни и одвичательни редактор кнїжки будзе Микола Шанта, фахови редактор др Яков Кишюгас, редактор Микола М. Цап, а у твореню кнїжки оперативно будзе участвовац и Ваня Дула, дознава Рутенпрес од члена Ушорйовацкого одбору др Владимира Кирду Болгорвеса.

Порадзене же видавателє буду Завод за културу войводянских Руснацох, НВУ „Руске слово”, Оддзелєнє за русинистику Филозофского факултету у Новим Садзе и Академия наукох, културох и уметносцох Войводини.

Ушорйовацки одбор вчера одлучел же будзе обявена єдна, а нє два кнїжки, як то у инициятиви було предложене, а у кнїжки буду позберани рецензиї, прикази и обсяжнєйши студиї о Тамашових творох на трох язикох – руским, сербским и українским, односно так як су обявени у ориґиналє, з тим же тексти по українски буду преложени и на сербски. По сербски буду обявени и даскельо тексти хтори у ориґиналє написани на анґлийским и италиянским язику.

Як за Рутенпрес гварел др Владимир Кирда Болгорвес, Ушорйовацки одбор ше наздава же кнїжка будзе обявена нарок.

ПОВЯЗАНИ ТЕКСТИ