ШИД – Члени Скупштини д.о.о. „Руски двор” всоботу, 28. фебруара, розпатрали и прилапели Звит о роботи и финансийни звит Винариї за прешли рок, як и План роботи за чечуци 2015. рок.
Констатоване же прешли рок бул нєвигодни за продукцию грозна и вина и же ше дотерашнї длуства вимиря зоз субвенцийох и предаваня вина.
Скупштина одлучела и же би ше окончело докапитализацию, а понеже од скорей на моци одлука же поєдинєчни винос нє може буц висши як 10 одсто, одлучене же за нових укладачох минимум укладаньох будзе пейц одсто.
З оглядом же двоме укладаче нависцели виступанє з Винариї, о їх одлуки, у чеше од седем днї, буду обвисцени шицки укладаче котри маю право першенства превжац їх учасац, по терашнєй вредносци акцийох, лєбо и висшей.
На Скупштини одлучене же би ше набавело атомизер, прикоч и ткв. мулчер, як и же би Вивершни одбор позберал понукнуца хижох за осиґуранє маєтку, насампредз од каменцу.
Скупштина принєсла и одлуку же закуп пиньвици у будинку Лєтнєй владическей резиденциї будзе 10 одсто од нето випродукованого количестав вина (по одбиваню шицких трошкох), и то у вину на дзень 31. децембра у єдним року, а предлог контракту будзе усоглашени медзи Винарию и церкву.