У Новим Орахове, у орґанизациї Здруженя „Чипки и ружи”, отримани Дзень бундави, на хторим ше за змаганє приявели дзешец екипи – зоз Бачкей Тополї два, зоз Байши и Душанова по єдна и шейсц з Нового Орахова.
Програма почала на 10 годзин, а присутних привитала предсидателька Дружтва „Чипки и ружи” Валерия Баранї. Потим дзеци з Основней школи виведли кратшу забавну програму на тему тей манифеставиї.
Того року найдлугшу бундаву – 180 цм, принєсол Иштван Такач зоз Торньошу. Найориґиналнєйшу фиґуру зоз бундави направела екипа „Родичи” з Нового Орахова.
За найкрасшу икебану зоз бундави жири преглашел роботу екипи „Не фелейд” зоз Бачкей Тополї. Найвекшу и найчежшу бундаву – 44,2 килову, принєсол Золтан Рекецки з Нового Орахова.
У бавискох на отвореним у куґланю зоз бундаву перше место освоєла екипа Байши. У цильованю бундави до кошара, найуспишнєйши були члени екипи „Орхидея” зоз Бачкей Тополї. У дриляню фурика з бундавами найшвидша була домашня екипа „Армида”.
И того року було вельо нащивительох, хтори могли коштовац вецей як 30 рижни колачи з бундави. За шицких учашнїкох орґанизовани заєднїцки полудзенок, таргоня з домашню колбасу.
У орґанизациї помогли спонзоре МЗ Нове Орахово, Козма Пали, Аґота Хедєли, Оскар Корачонї и фамелия Рекецки, хтора помага каждого року.
