ВЕРБАС – У КПД „Карпати” у Вербаше всоботу, 21. мая, отримани Шести Хорски фестивал „Карпати”.
У полней сали Дружтва присутним ше представели домашнї Хор КПД „Карпати”, под дириґенством Надїї Воротняк, Мишани хор Дому култури Руски Керестур и Катедралней церкви св. о. Миколая, под дириґентсвом Лидиї Пашо, Хор „Гармония” з Нового Саду, под дириґенством Весни Кесич Крсманович, та шпивацка ґрупа „Русински зарї” зоз Сримскей Митровици, под дириґенством Даниєли Горняк.
Госци на Фестивалє були Хор „Бачки шпиваче” з Вербасу, под дириґенстку палїчку Єлени Алексич и Хор „Алпе Адриа” з Удинох, з Италиї, на чолє з дириґентом Андреом Тофолинийом.
Учашнїкох и госцох привитал предсидатель Националного совиту Руснацох Славко Рац, а на Фестивалє присуствовали и народна посланїца Олена Папуґа, предсидатель Општини Вербас др Братислав Кажич, котри тиж привитал учашнїкох, як и помоцнїца предсидателя Општини Ксения Бенце.
На Фестивалє присуствовали и нашо священїки – нововербаски парох о. Иґор Вовк, старовербаски парох о. Алексий Гудак, керестурски парох о. Михайло Малацко, коцурски парох о. Владислав Рац, редакторка рускей редакциї Радио Нового Саду Златица Няради и други.
Публика уживала и з моцнима аплаузами привитала наступи хорох, а после манифестациї орґанизоване дружене у Центре за физичну културу „Драґо Йовович”.
Фестивал отримани з потримовку Националного совиту Руснацох, Општини Вербас, Покраїнского секретарияту за културу и явне информованє и Покраїнского секретерияту за образованє, управу и национални меншини-заєднїци.