О дзешец днї „Коцурска жатва”

автор тах
879 Опатрене

КОЦУР – Пририхтованя за тогорочни Фестивал фолклору Руснацох „Коцурска жатва” уж при концу, бо Фестивал у Коцуре будзе отримани 15. и 16. юлия (пияток и собота).

На остатнєй схадзки Орґанизацийного одбору Фестивалу, отриманей пондзелок, 4. юлия у Доме култури у Коцуре, подробно утвердзена програма, учашнїки, и други провадзаци змисти важни за орґанизованє Фестивалу.

Як и дотераз, „Коцурска жатва” будзе мац централну програму, на соботу, 16. юлия, и провадзаци програми исти и дзень пред тим.

Фестивал на пияток, 15. юлия, почнє з Литературним вечаром у лєтнєй учальнї ОШ „Братство єдинство” (на 21 годзин), а потим опрез Дому култури (на 22 г.) будзе програма за младих „Тамбуранє”.

2-Zatva-02

На соботу, 16. юлия, як провадзаци програми буду вистава народних облєчивох, презентация кнїжки „Облєчиво и танци бачванско-сримских Руснацох” и етно-столи. Провадзаца програма будзе у физкултурней сали Основней школи и почнє на 18,30 годзин.

Централна програма на соботу вечар на лєтнєй бини Дому култури будзе зоз штирох часцох – на 20,30 г. будзе наступ дзецинских фолклорних ансамблох КУД „Жатва” и КУД „Завичајно врело”, потим фестивалска часц, на хторей наступя КУД з Коцура, Нового Саду, Нового Орахова и Дюрдьова, а у ревиялней часци, попри спомнутих КУД-ох наступи и КПД зоз Шиду и Дом култури Руски Керестур.

Медзи фестивалску и ревиялну часцу програми наступя госци з иножемства – ансамбл „Кичера” зоз Словацкей.

Друженє будзе предлужене и по програми на Торба-балу, з тамбурову музику. Уходнїца на централну програму 100 динари, а за провадзаци програми уход задармо.

ПОВЯЗАНИ ТЕКСТИ