ҐОСПОДЇНЦИ – У орґанизациї Дружтва за руски язик, литературу и културу у Ґосподїнцох идуцого пиятку, 29. юлия, почина тогорочна 12. Подобова колония „Стретнуце у Боднарова”, а на нєдзелю будзе отримана и 15. Дзецинска подобова колония.
Подобова колония „Стретнуце у Боднарова” у просторе ОШ „Жарко Зренянин” у Ґосподїнцох будзе од 29. по 31. юлий, а и того року на нєй участвую визначни подобово уметнїки. На нєдзелю, 31. юлия, на „Стретнуцу у Боднарова” участвую и дзеци подобово творителє.
Тогорочна Колония будзе отримана у рамикох означованя 120-рочнїци народзеня Сави Шумановича и 80 рокох од народзеня Гелени Крклюш Фейди, подобовей уметнїци з Ґосподїнцох.
Под час Колониї, у Подобовей ґалериї у Ґосподїнцох, у Месней заєднїци, буду виложени роботи з прешлорочней Подобовей колониї „Стретнуце у Боднарова”, хтору провадзи и окремни каталоґ.