КУЛА – Представа „Вожд” („Вођа”) по тексту Радоя Домановича, у режиї Бояна Йовановича, а у виводзеню Младежскей сцени Театру „Бора Станкович” з Враня – побиднїк тогорочного 58. Републичного фестивалу аматерских театрох у Кули. Попри Златней плакети, представа, у хторей найстарши ґлумец ма лєм 20 роки, достала и награду за драматизацию, режию и сценски рух.
Друге место и Стриберну плакету освоєла представа „Ад инфинитум” Словацкого театру „Владимир Гурбан Владимиров” Словацкого КУД „Герой Янко Чмелик” зоз Старей Пазови, у режиї Мирослава Кожика, а треце место и Бронзову плакету освоєла представа „Чудо у Шарґану” Любомира Симовича, у режиї професийного ґлумца Радоя Чупича, а у виводзеню Театру „Стеван Сремац” Дому култури Червинка.
Републични фестивал аматерских театрох Сербиї у Кули отримани од 17. по 25. юний, змагали ше осем представи, а того року його отримованє у цалосци финансовала Општина Кула.
Фестивал орґанизовали Союз аматерох Сербиї, Културно-просвитна заєднїца Општини Кула и Културни центер Кула.