НОВИ САД – Пре нєвигодну хвилю, алє и други фактори, пчоларе у Сербиї того року випродуковали штреднє 1 100 тони меду, цо пейц раз менєй од просеку, а Союз пчоларских орґанизацийох Сербиї оценєл же утрати буду барз вельки.
– Кед пойдзеце до природи, видзице значни пременки пре часте хаснованє хемийних средствох у польопривреди. То меня состав рошлїнох, та ше зявели чкодлївци, инсекти и други орґанизми хтори нїґда нє жили на наших просторох – гварел Дьордє Мркич з Дружтва пчоларох „Йован Живанович“.
На чкоду пчоларом и зявенє фалшивого меду, чия цена нїзша од реалней, крадзи кошнїцох, та високи цени за пашу пчолох, бо, поведзме, поставянє єдней кошнїци на Фрушкей гори кошта 200 динари.
Пчоларе и значни вивожнїки, аж маю вецей иножемних як домашнїх купцох, а з вєдно 2 000 тони рочного вивозу, скоро половка мед з Войводини, та пчоларе обчекую векши пориви за продукцию.
Пре таки стан у пчоларстве, з ребалансом покраїнского буджету буду опредзелєни додатни 10 милиони динари за ришованє проблемох войводянских пчоларох, наявели з покраїнского секретарияту за польопривреду.