ШИД – Предсидатель Општини Шид Предраґ Вукович и директор Заводу за културу войводянских Руснацох Серґей Тамаш вчера, 8. юлия, у Шидзе подписали Протокол о сотруднїцтве медзи локалну самоуправу и Заводом у орґанизованю Централней преслави националного швета Руснацох у Бикичу и Шидзе, хтора будзе 14. януара 2017. року.
З Протоколом реґуловане и же од шлїдуюцого року Фестивал тамбурових оркестрох „Мелодиї Руского двору” войдзе до календару културних подїйох у Шидзе.
З нагоди подписованя Протоколу предсидатель Општини Предраґ Вукович вчера приял делеґацию Руснацох у хторей, окрем спомнутого Тамаша, були и подпредсидателька Националного совиту (НС) Руснацох Наташа Еделински Миколка, предсидатель Вивершного одбору НС Желько Ковач, началнїк Општинскей управи Шид Ромко Папуґа, предсидатель Совиту Месней заєднїци Бикич и КПД „Иван Котляревски” з Бикичу Деян Бобаль, парох у Беркасове и Бикичу о. Владимир Еделински Миколка, подпредсидатель КПД „Иван Котляревски” Янко Гнатко и секретар спомнутого дружтва Зденко Лазор.
З тей нагоди бешедовани о орґанизациї Централней преслави национаного швета Руснацох нарок 14. януара у Бикичу и Шидзе, а як наглашене, локална самоуправа да максималну потримовку же би вона була цо лєпше орґанизована.
