ВЕРБАС – У складзе з политику Покраїнскей влади о сотруднїцтве зоз шицкима локалнима самоуправами на териториї АП Войводини, вербаску општину вчера нащивел подпредсидатель Покраїнскей влади Дьордє Миличевич, дзе бешедовал з руководзацима у Општини, а нащивел и Централне построєнє за пречисцованє отпадних водох, чия вибудов при самим концу.
Як гварел Миличевич, стретнуце було окреме хасновите, бо дефиновани напрями сотруднїцтва Покраїни з Општину Вербас по конєц того рока, так же АП Войводина з 50 милиони динари потрима доконченєн вибудови канализацийней мрежи на териториї вербаскей општини.
Предсидатель Општини Вербас Милан Ґлушац тоту потримовку оценєл як барз значну, бо Централне построєнє за пречисцованє води, чию вибудов финансовала Европска уния, нє може почац робиц покля нє будзе закончена канализацийна мрежа. Аж теди почнє конкретне ришованє заґадзеного Велького Бачкого каналу, як єдного з найвекших проблемох вербаскей, кулскей и других општинох.
Ґу тому, Покраїнска влада и Општина Вербас буду вєдно розвивац индустрийни зони и їх инфраструктурне и комуналне опреманє пре прицагованє инвеститорох, гварене на вчерайшим сходзе, а бешедоване и о нєдоконченей вибудови вербаского Дому култури.
З подпредсидательом Покраїнскей влади Миличевичом, у нащиви Општини Вербас вчера були и покраїнски секретар за польопривреду, водопривреду и лєсарство Вук Радоєвич и директор Управи за капитални укладаня Войводини Неделько Ковачевич.
