РУСКИ КЕРЕСТУР – Предсидатель Националного совиту (НС) Руснацох Славко Рац, предсидатель Вивершного одбору Совиту Желько Ковач и о. д. директора Дому култури Руски Керестур Йоаким Рац вчера у Керестуре орґанизовали приєм за делеґацию Свиднїку, зоз Словацкей, на чолє з городоначалнїком Яном Голодняком, хтора у нашей жеми пребувала през викенд. На приєму присуствовал и секретар Представителя Руснацох Городу Заґреб Яким Павлович.
Делеґация Свиднїку була госц побратоменого Вербасу, а мала буц госц и на тогорочней „Червеней ружи”, на поволанку Фестивалу.
После соботових розгваркох у Општини Вербас и нащиви Новому Саду, дзе им домашнї бул директор Заводу за културу войводянских Руснацох Серґей Тамаш, а у Новим Садзе з делеґацию зоз Словацкей була и народна посланїца Олена Папуґа, у Керестуре вчера нащивели и привреднїка Елемира Раца, та Водицу.
На розгварох з Яном Голодняком предсидатель НС Славко Рац и о.д. директора Дому култури Йоаким Рац найвецей бешедовали о инициятиви же би цо баржей сотрудзовали руски/русински фестивали у вецей жемох – Фестивал русинскей култури у Свиднїку („Русински фестивал”), „Петровски дзвон” у Горватскей, Фестивал рускей култури „Червена ружа” у Сербиї, та одредзени фестивали у Польскей и України.
Як гварене, инициятива, з хтору ше нєдавно зложели и представителє Руснацох у Горватскей же би руски/русински фестивали сотрудзовали нє лєм прейґ черанки програмох, алє на одредзени способ були обєдинєни и прейґ финансованя з фондох ЕУ, далєй будзе розпатрана и розрабяна.
