ДЮРДЬОВ – У Дюрдьове першираз оквицени центер валала. На дванац слупох вонконцом двох улїцох на главней драги поставене новорочне ошвиценє у форми розличних пахулькох и гвиздох справених зоз арматури и лед-флекс черева, односно ошвиценя.
Тото новорочне ошвиценє направели и поставели Дарко Дошлов и Педя Маркович, приватни поднїмателє зоз Дюрдьова. Вони двоме сами финансовали тоту роботу, кажде у своєй дїялносци.
Же би тото шицко було реализоване, достали дошлєбодзенє од Месней заєднїци Дюрдьов, як и ЯКП „Чистота” Жабель, котре отримує явне ошвиценє у местох тей општини. Тото новорочне ошвиценє приключене на явне ошвиценє на слупох дзе су и поставени.
