ҐОСПОДЇНЦИ – Вчера у Основней школи „Жарко Зренянин“ у Ґосподнїцох почала Дванаста Подобова колония „Стретнуце у Боднарова”, на хторей участвую прейґ двацец подобово уметнїки, углавним академски маляре, подобово педаґоґи и маляре-аматере з вецей местох – з Вербасу, Нового Саду, Сримскей Каменїци, Петроварадину, Коцура, Чуроґу, Жаблю, Бачкого Ярку и Ґосподїнцох.
У орґанизациї Дружтва за руски язик, литературу и културу, Колония тирва по нєдзелю, 31. юлий. Теми шлєбодни, а малює ше на рижних димензийох платна, паперу, лєбо на склу. Учашнїки би мали намальовац по два малюнки.
На ютре, на нєдзелю, на истим месце – у голу ОШ – будзе отримана и Дзецинска колония, петнаста по шоре, на хторей буду участвовац петнацецеро дзеци зоз Жаблю, Дюрдьова, Нового Саду, Руского Керестура и Ґосподїнцох.
Подобову колонию ше отримує у рамикох означованя 120-рочнїци народзеня Сави Шумановича и 80 рокох од народзеня Гелени Крклюш Фейди, подобовей уметнїци з Ґосподїнцох.
У рамикох Колониї у Подобовей ґалериї у Ґосподїнцох, у просторийох Месней заєднїци, буду виложени роботи з прешлорочней Подобовей колониї.
Отримованє Подобовей колони „Стретнуце у Боднарова” материялно помогли Општина Жабель и єй Туристична орґанизация, Землєдїлска задруґа и „Влашки-промет”.