КОЦУР – Вчера вечар у сали Месней заєднїци у Коцуре Подручна канцелария Националного совиту (НС) Руснацох отримала схадзку з родичами потенциялних школярох у руских оддзелєньох у коцурскей ОШ. Сход з родичами отримани на основи заключеньох зоз схадзки Подручней канцелариї, хтора прешлого тижня отримана з представителями НС и наставним кадром коцурскей основней школи и дзецинскей заградки. На вчерайшей схадзки нє було вельо родичох, як анї наставнїкох зоз школи.
Схадзку отворел подпредсидатель НС и єден з иницияторох тих сходох Микола Шанта, котри присутним родичом винєсол заключеня до хторих ше дошло на схадзки Подручней канцелариї. Шанта розтолковал и интерес їх дзецох же би ше образовали на мацеринским язику, та хасен яки буду мац зоз знаньом вецей язикох, насампредз мацеринского.
– За дзецко окреме добре же би ше школовало у малих ґрупох, яки предходни роки маме у руских оддзелєньох, понеже ше теди учительки максимално можу пошвециц каждому школярови. Билинґвалносц єдна з предносцох, ґу тому, дзецко прилапи руски идентитет, научи язик, алє нє занєдзба анї сербски язик, хтори нєминовни у штредку у хторим жиєме. Руским дзецом у сербских оддзелєньох чежше, понеже роздумую по руски, а одвити прекладаю на сербски язик. Сербски дзеци вельо швидши, бо на сербским уж роздумую. И конєчно, нє треба ше обтерховйовац з тим же дзецко будзе мац єдну годзину вецей. Дзеци у тим возросту прирапюю шицки нови спознаня и нє треба шпоровац на ученю – гварел медзи иншим Шанта.
Схадзка предлужена з розгварку родичох и наставного кадру, дзе родичи котрим дзеци уж у руским оддзелєню потолковали причини такого опредзелєня, а обрацена увага и на тото же єст мацери котри нє Рускинї, а свойо дзеци уписали до руского оддзелєня.
На схадзки заключене же родичох потребне мотивовац вельо скорей як пред самим уписом до школи. Поведзене же би дзеци уж у яшелькох, од штирох рокох, мали мац розлучене руске оддзелєнє, цо у Коцуре нє случай. Проблем и же родичи анї нє мали нагоду вияшнїц ше о снованю такого оддзелєня у дзецинскей заградки, бо су того року о тим анї нє анкетовани.
Плановане и надалєй отримовац подобни сходи, а на шлїдуюцим ше обчекує векше число родичох. Тиж так, Подручна канцелария НС попробує дознац и причини пре хтори родичи нє жадаю уписац свойо дзецко до руского оддзелєня.