СЕРБИЯ – Влада Сербиї, на предкладанє Републичного штабу за позарядово ситуациї, преглашела позарядову ситуацию на териториї цалей Сербиї.
Одлука принєшена як превентивна мира з хтору ше олєгча роботу шицким орґаном Републики Сербиї у охрани животох и безпечносци гражданох и маєтку, як и у одклоньованю пошлїдкох вилївох.
Влада Сербиї будзе каждодньово отримовац схадзки Републичного штабу за позарядово ситуациї, будзе нєпреривно провадзиц ситуацию на терену и о тим обвисцовац гражданох, гвари ше у сообщеню Канцелариї Влади Сербиї за сотруднїцтво з медиями.
Цала ситуация погоршана и з миґрантску кризу, та полициї у охрани гранїцох будзе помагац и Войско Сербиї.
Влада апелує на шицких гражданох же би почитовали Одлуки Влади Сербиї и же би дали шицко од себе же би ше зопарло векши пошлїдки у критичним дижджовним периодзе котри ма тирвац до вовторку.