Пре вельки дижджи вода стої на вецей местох

автор зам
991 Опатрене

РУСКИ КЕРЕСТУР – Перше вноци и вчас рано, а потим и после 13 годзин, у Руским Керестуре вчера, 13. юния нападал барз вельки диждж, та пре вельке количество, атмосферска вода стої на вецей местох у валалє.

Як вимеране, вноци и рано спадло коло 30 литри води по квадратним метеру, а пополадню и до 50, так же ярки нє лєм же преполнєти, алє прелїваю на дражки и калдерму, под воду и загради. Ляду и витру нє було, лєм дацо вецей як годзину падал барз вельки диждж, а познєйше през дзень и менши.

3-Voda-02

До Месней заєднїци (МЗ) вчера нєпреривно волали Керестурци опрез котрих преляла вода хтора нє може одходзиц пре загарнути ярки, нєположени пайпи и други проблеми з падом и одцеканьом атмосферскей води. Як дознава Рутенпрес, МЗ вецей нє компетентна за комунални проблеми, та ше людзох упутйовало на општинского комуналного инспектора.

З буджету МЗ и того року опредзелєни пенєж за оправянє яркох и других поверхносцох пре цо лєпше одводзенє атмосферксйе води, а початок тей роботи завиши од кулского ЯП „Завод за вибудов”, хторе ма розписац явну набавку за тоту роботу. Кеди будзе розписана явна набавка и кеди почню роботи – за тераз нє познате.

Як гваря фаховци, тот вельки диждж и познєйши випарйованя пре векши температури начкодзи и шацом, насампредз житу и паприґи.

3-Voda-03

ПОВЯЗАНИ ТЕКСТИ