Општинска рада у Шидзе прилапела Оперативни план охрани од вилївох за 2016. рок, у котрей Општински штаб за позарядово ситуациї визначел загрожени подруча на рикох першого и другого шора и предвидзел фахови оперативни тим за ратованє.
Општинска рада у Шидзе прилапела Оперативни план охрани од вилївох за 2016. рок на схадзки, хтора отримана прешлого пиятку, 11. марца. Як наглашел Никола Васич, предсидатель Општинскей ради, план ше нє розликує вельо у одношеню на подобни план за 2015. рок. У плану назначени загрожени подруча на рикох першого и другого шора, а Општиснки штаб за позарядово ситуациї ма 15 особи. Тиж предвидзени и фахови оперативни тим за ратованє на води. Предсидатель Васич наглашел же идентификовани, такволани „дзиви цеки” на подручу општини Шид, потим обовязки явних подприємствох, анґажованє потребних транспортних превозкох як и локациї, будинки, за евентуалне змесценє загрожених людзох и маєтку. После прилапйованя плану Општнскей ради остава же би конєчне слово дала и Скупштина општини Шид.
На схадзки прилапени Правилнїк о нукашнїм ушореню и систематизациї Општинскей управи, а по тей точки уводнїчар бул Ромко Папуґа, началнїк Општинскей управи. Вокраци, максималне число занятих будзе 95 заняти (92 плус 3) медзи хторима и тройо помоцнїки предсидателя општини. Як Папуґа обгрунтовал, помоцнїки нє вязни персонално, за мено, алє, лєм покля окончую тоту длужносц, односно функцию. Општинска рада прилапела Програми дїлованя за 2016. рок за Явне подприємство за квартельни услуги и будовательну жем, як и Народней библиотеки „Симеон Пищевич”, Установи за физичну културу и спортску рекреацию „Партизан”, Туристичней орґанизациї и Културно-образовного центру. Тиж, прилапени и звит ликвидацийного управнїка ЯП „Спортски центер” Миодраґа Марковича, хтори наглашел же ликвидацийни поступок нє закончени, бо пецеро заняти порушали судски поступок же би наплацели ювилейни награди у суми 234 211 динари.
Општинска рада прилапела и предлог о пременки у членстве у Општиснкей виберанковей комисиї у хторей члена Деяна Лоґарушича (СПС) требал би заменїц Драґан Тарлач, з огядом же, як гварене, Лоґарушич будзе кандидат СПС за одборнїка у СО Шид.
Општинска рада опредзелєла 200 000 динари за саниранє ошвиценя у физкултуней сали Ґимназиї „Сава Шуманович” у хторей ше случело же неонки одпадовали з повали. Тераз би ше покладло ошвиценє з боку, на мури, цо би було и безпечнєйше.