СЕРБИЯ – За пориви у обласци польопривреди, рурални розвой и кредитну потримовку, держава того року уложи 24,5 милиярди динари. Як цо и наявйоване, Влада Сербиї прилапела Уредбу з хтору сце охранїц малих продуковательох, та так будзе давац субвенциї лєм за 20 гектари по ґаздовстве.
Мири аґрарней политики у 2015. року подобни як и прешлорочни, крем же ше ґу постояцим уведзе ище два за розвой статкарства. Фаховци з обласци привреди на велї заводи визначовали же Сербия ма вельки потенциял за розвой статкарства, алє го мало хто препознава. Затераз познате же буду видвоєни пенєжи за премиї за млєко, квалитетни приплодни статок, за карменє целятох, швиньох, баранчатох, за унапредзенє пчоларства и хованє риби.
Буджет Министерства польопривреди того року за коло 10 одсто менши у одношеню на прешлорочни, алє як твердза у Министерстве, то нє будзе мац вельки пошлїдки на польопривреднїкох, док вельки польопривредни продукователє процив одлуки Влади же субвенциї годно достац за найвецей 20 гектари по ґаздовстве.