РУСКИ КЕРЕСТУР – Найлєпши школяре у прешлим школским року у штвартей и осмей класи Основней школи и у руским оддзелєню матурантох Ґимназиї „Петро Кузмяк” на пригодней шветочносци у Замку у Руским Керестуре всоботу, 2. юлия, достали припознаня од Дружтва за руски язик, литературу и културу.
Припознанє „Славка Сабадош”, на предкладанє Школи, достали школяре двох оддзелєньох штвартей класи Дарко Провчи и Ребека Семан, та осмей класи ОШ Мартина Афич и Тереза Будински.
Припознанє з меном учителя Янка Олеяра за найлєпшого школяра-матуранта у руским оддзелєню Ґимназиї достала Тамара Будински.
Припознаня школяром уручела секретар Дружтва Ирина Папуґа, а на шветочносци присуствовали и предсидатель керестурскей Секциї Дружтва Владимир Дудаш, супруга Янка Олеяра Ирина Олеяр, док биографиї ношительох припознаньох – Славки Сабадош и Янка Олеяра пречитали Ванеса Медєши и Мария Дорошки.
На шветочносци авторски прикладнїки Зборнїку роботох „Студия Рутеника 20” достали авторки Кристина Малацко, Марина Колошняї и Татяна Ґовля, як и о. мр Михайло Малацко и о. Михайло Шанта за свойо написи о визначних преднякох РНПД, хторе основане праве на дзень шветочносци – 2. юлия 1919. року.
Ирина Папуґа керестурскей парохиї придала и подзекованє и прикладнїки кнїжки Леони Лабош Гайдук „Цеплосц дїлох, перли словох”, о културних дїячох з фамелиї Лабош, чийо видаванє финансийно потримала и керестурска парохия.