НОВИ САД – Вше вецей Новосадянє думаю же Нови рок треба преславиц у меншим кругу фамелиї и приятельох, та и попри тим же Нови Сад понука вельо можлївосци за дочек Нового року, векшина гражданох тот рок випровадзи дома, з фамелию и найблїзшима, указую резултати двох нєзависних анкетох хтори запровадзели интернет портал 021 и аґенция „Нинамедия“.
Гевти котри нє сцу потрошиц вельо пенєжи Нови рок углавним дочекаю на Площи шлєбоди, дзе наступя ґрупи „Ван Ґоґ”, „Партибрейкерси”, „Лав Гантерси” и ище два менши бенди. У исти час у Католїцкей порти буду наступац диджейове.
Погосцителє гваря же интересованє за дочек Нового року у їх обєктох вельке, та же места углавним розпредани.
Цени за Дочек рижнородни и рушаю ше од 500 по даскельо тисячи динари. Младша популация Нови рок углавним дочекує у кафичох и клубох, у хторих ше наплацує уход, а цени напою стандардни, лєбо 10 одсто векши. Ресторани понукаю комплетни мени, дзе урахован и напой и музика, а за таку файту славя треба видвоїц даскельо тисячи динари.