БЕОҐРАД – Ревизиї Акцийного плану за национални меншини, хтори часц Поглявя 23 у прегваркох за приступанє ґу ЕУ – нє будзе, гварела министерка державней управи и локалней самоуправи Ана Брнабич на конференциї за медиї после вчерайшей схадзки з представителями националних совитох (НС) националних меншинох у Сербиї, сообщене з Министерства, а преноша медиї.
Як гварела, нєт причини за ревизию Акцийного плану, понеже є принєшени з консензусом и у його пририхтованю участвовали представителє 21 националней меншини. До одредзеного моменту у тим участвовали и представителє Националного совиту Бошнякох, котри ше, як гварела, потим сами виключели з дальшей роботи на тим документу.
Ревизию Плану нєдавно предложел предшедуюци Координациї НС-ох и предсидатель НС Бошнякох Сулейман Уґлянин котри, як сообщене, нє присуствовал на вчерайшей схадзки з министерку.
После схадзки з представителями НС-ох, на хторей спред НС Руснацох присуствовал його предсидатель Славко Рац, министерка державней управи и локалней самоуправи Ана Брнабич виявела же Сербия потвердзела же є шампион у Европи у почитованю меншинских правох, з намиру же би то так и остало. Як гварела, по тим питаню ше Сербия од других жемох у Европи розликує по тим же институционализовала механїзми сотруднїцтва з националнима меншинами.
– Влада Сербиї вельо зробела на розвою диялоґу з представителями националних меншинох – гварела Брнабичова, наглашуюци же имплементованє Акцийного плану, хтори Влада прилапела у марцу, тераз найважнєйши задаток.
Додала же у запровадзованю Акцийного плану обчекує потримовку шицких националних меншинох, алє и институцийох як цо то Поверенїк за защиту ровноправносци и Канцелария за людски и меншински права, а вчера наявела и же предстоя вименки и дополнєня Закона о правох националних меншинох и Закона о националних совитох националних меншинох.