Еґзит авантура – 190 тисячи людзох за штири днї на Петроварадинскей твердинї, а вецей як 500 виводзаче и нащивителє зоз цалого швета означели штири фестивалски днї, од 9. по 12. юлий. Мото тогорочного фестивалу – „Шир любов”. Отверанє, алє и заверанє капурох, було провадзене зоз длуготирвацим огньометом, зоз тим же внєдзелю то була окремна хвилька, бо, окрем же ше славело 15 роки Еґзиту, ґрупа хтора заверала фестивал – Faithless, на бини преславeла свой 20. родзени дзень.
Гоч найвекши гвизди углавним наступали праве на Главней бини (Main stage), на тогорочним Еґзиту було вецей як 20 бини, а найпопуларнєйши, окрем Главней, ту и Фюжн бина (Fusion) зоз реґионалну, Денс арена (Dance arena) зоз електронску музику, Латино бина, алє и бина добрих вибрацийох, познатша як Реґе бина.
Найвекши рекорд у децениї звалєни праве того року на 15. родзеним дню Еґзит фестивалу, зоз 190 тисячами нащивителями, а по поєдинєчних дньох – собота була найнащивенши дзень, теди було 52 тисячи еґзиташох, гоч капацитети Твердинї два тисячи менєй.
Главни виводзаче тогорочного фестивалу углавним зоз Велькей Британиї, та так першого дня фестивалу, штварток, наступела ґрупа Clean Bandit, а такой за нїма и Emely Sande, шпивачка зоз велькима вокалнима способносцами. Исти тот дзень на Денс арени наступели Adam Beyer и Chris Liebing, а на Фюжн бини Artan Lili и Drum’n’Zez.
Пияток, други дзень фестивалу, на Главней бини могло чуц интересантни жанри, та так перше наступел хеви рок бенд Motorhead, а после нїх и британски кантавтор Tom Odell хтори грає на клавиру. Голандска меґагвизда у диджей швеце – Hardwell, а потим и диджей Oliver Heldens зоз Британиї забавял публику на Денс арени.
Собота, дзень хтори звалєл шицки рекорди, бул наисце интересантни. Орґанизаторе гваря же уж на пол ноци карти були розпредати, а капацитети фестивала звекшани за пейц тисячи места так же направели вецей места на Денс арени.
Тот дзень бул и рижнородни, прето же могло стретнуц и младих и старших, алє тото цо найбаржей прицаговало увагу то же того дня могло видзиц и хлопох у святочних шматох, аж и зоз машлю.
Млади британски шпивач зоз специфичним гласом, John Newman, єдну годзину забавял масу на Главней бини, алє праве там настал „гаос ”кед пришли на шор Manu Chao зоз своїм бендом La Ventura. Велї ветеранє на Еґзиту коментаровали їх наступ, прето же тот бенд наступал пред даскельома роками – гваря же теди було лєпше. Цо ше дотика соботи, „гаос” бул и на Денс арени, кед наступал Martin Garrix, дзеветнацрочни Голандян, диджей и автор ґиґантского гиту „Animals” чий спот на Ютубу опатрело вецей як пол милиярди людзох.
Остатнї дзень новосадскей часци фестивалу означело госцованє диджейох зоз Денс арени на Главней бини, односно, вечар електронскей музики.
Ґрупа хтора на фестивалу славела и свой 20. родзени дзень – Faithless, наступела на пол ноци, а скорей нїх електоронски баси були и у наступу ґрупох Milky Chanse и Capital Cities. На Денс арени наступели Leftfield – британски продуценти хтори и здумали назву проґресивней хаус музики, а Денс арена як и вше потераз була єдна з бинох хтора завера капури фестивалу, та остатнї наступ на тей бини почал на пол седмей рано зоз диджеями Simian Mobile Disco и Roman Flugel.
Остатнє рано велї зоз реґиону дочекали на Фюжн бини, зоз горватску ґрупу Hladno pivo, хтори ше окрем з потерашнїма гитами, публик представели и зоз писнями зоз нового албуму „Dani zatvorenih vrata”.
Друга часц фестивала – Sea Dance, отримує шена плажи Яз у Будви, од 15. по 18. юлий. Єдни з найвекших менох на „морскей” часци Еґзиту The Prodigy, Roisin Murphy, Rudimental, Dubioza kolektiv и други.
OPENS Youth Fair 2015 и GET EXITEed – ЗОГРИВАНЄ
Штварти реґионални Саям младежского туризма OPENS Youth Fair 2015 отримани 7. и 8. юлия на Площи шлєбоди и у Католїцкей порти у Новим Саду.
У центру города були поставени штанди дзе ше представели найатрактивнєйши младежски дестинациї и случованя на Балкану. Панел дискусия „Младежски престолнїци Европи” як модел брендираня дестинациї отримана другого дня сайму у Студентским културним центру „Фабрика. ”
Милица Дїлас зоз Еґзит фондациї толкує же нащивителє Сайма младежского туризма шицки хтори ше у тей хвильки найду у центру города и же ше вони намагали же би им дали причину же би там и остали.
– Праве през креативни индустриї, як младу привредну часц, Саям жада же би ше Нови Сад представел зоз шицкима капацитетами як найкреативнєйше и найпозитивнєйше место за младих зоз цалого швета. Важне указац же Нови Сад город у хторим мож чуц и класичну музику, джез и други музични жанри хтори нє каждодньовосц кед слово о концертних наступох на отвореним.
GET EXITEed – програма за зогриванє пред Еґзит була рижнородна, а нащивителє могли слухац кантату Karla Orfa „Karmina burana” хтору виведол оркестер, хор и солисти Сербского народного театра зоз дириґентом Микицом Євтичом. Други дзень Сайма означела и реґионална ґрупа S.A.R.S., алє и диждж хтори розхладзел лєм температуру и асфалт у городу, а предфестивалска атмосфера постала ище лєпша.
У Католїцкей порти була поставена ище єдна бина зоз реґе и латино ритмами.
УПЕЧАТКИ ЗОЗ ФЕСТИВАЛА
– Фернандо, 28: Пришол сом зоз Мексику и други раз сом у Сербиї, а першираз на Еґзиту. Барз ми ше пачи атмосфера на фестивалу, алє и людзе – приємни су, любезни, и мож найсц барз добрих пайташох. Найволїм пойсц на Денс арену и на Латино бину, алє сом слухал и Manu Chao.
Мартина, 23: Други раз сом на Еґзиту и барз ми було фино. Нє пришла сом же бим слухала даєдну ґрупу окреме, алє сом пришла дожиц тоту окремну атмосферу на фестивалу, упознац интересантних людзох и натанцовац ше. Лєдво чекам нарок ознова.
Желько, 24 и Дориян, 22: Еґзит уникатни, окремни фестивал зоз барз вельо добрей музики. Кажде дацо може пренайсц. То єдно фине место дзе шицки уживаю и дзе ше нє спомина политика и Сербия, лєм добри журки и уживанє.
Саня, 30: Ишла сом ше на фестивал видюскац. Нє будзем шицки днї на фестивалу, лєм два – пре обовязки, алє ми атмосфера барз одвитує.
