КУЛА/РУСКИ КЕРЕСТУР – Општина Кула 15. юлия виплацела ище 6 милиони динари за финансованє порядней дїялносци спортских клубох у местох кулскей општини, так же з тим у цалосци вимирена тогорочна обовязка Општини спрам клубох. У априлу им тиж уплацени 6 милиони динари.
Вєдно 12 милиони динари достали 43 спортски клуби з местох општини, а 7 клуби Спортского дружтва (СД) „Русин” у тим року за порядну роботу од Општини достали вєдно милион 451 000 динари.
Як Рутенпрес дознава од секретара СД Бориса Шайтоша, Фодбалски клуб „Русин” достал 508 000, два рукометни клуби (хлопски и женски) вєдно 427 000, по 168 000 достали Атлетски и Столнотениски клуб, Карате клуб достал 120 000, а Конїцки клуб „Русин” 60 000 динари.
Средства нє достали два „Русиново” клуби – Боди-билдинґ и Здруженє спортских рибарох „Коляк”, понеже до одредзеного часу до Општини Кула нє придали звити о трошеню прешлого року достатих средствох.