ШИД – Социялдемократска странка (СДС) на вчерайшей конференциї за новинарох у шедзиску странки у Шидзе представела кандидатох за одборнїкох и посланїкох до Народней Скупштини Сербиї и Скупштини АП Войводини.
СДС на локални виберанки виходзи у коалициї з Демократску странку, Лиґу соцоиялдемократох Войводини, Желєну еколоґийну партию-Желєни и Либерално демократску партию. Коалицийна лїстина ноши назву „Час за шорових людзох”, на збирней лїстини є под числом седем, а спомедзи 39 кандидатох за одборнїкох, дзевец зоз СДС.
На виберанкох за Народну скупштину кандидати СДС зоз шидскей општини Наташа Цвєткович и Желько Брестовачки, а ту є у коалициї з Лиґу социялдемократох Войводини и Либерално демократску партию. Тота лїстина, тиж под числом седем, наволана „Союз за лєпшу Сербию”.
На виберанкох за Скупштину АП Войводини СДС виходзи у коалициї з Либерално демократску партию, и їх лїстина под числом осем ноши назву „Союз за лєпшу Войводину”. Зоз шидскей општини ту дзевец кандидати, дзе Желько Брестовачки на трецим, а Наташа Цвєткович на шестим месце.
Цвєтковичова кандидатка и за одборнїка у СО Шид, на трецим месце на лїстини, иа на конференциї за новинарох поволала гражданох же би 24. априла у цо векшим чишлє вишли на виберанки и гласали за тих котри оможлївя лєпши Шид, Войводину и Сербию.