НОВИ САД – На Польопривредним факултету у Новим Садзе всоботу, 13. децембра, отримани преподаваня и совитованє за продуковательох грушкох и бишалмох. Интересованє за тоту тему вельке, цо було обачлїве по велькому числу овоцарох з цалей Сербиї, медзи нїма були и з подприємства „Юарбис” и „Те-пам” з Руского Керестура, як и дзепоєдни керестурски овоцаре.
Сход отворели представителє Покраїнскей Влади, а покраїнски секретар за польопривреду, водопривреду и лєсарство Бранислав Боґарошки гварел же, крем до подзвигованя квалитету саднїцох и подзвигованя нових засадох, важне укладац и до менших прерабяцких капацитетох и з тей нагоди наявел субвенциї хтори буду покривац 50 одсто укладаня.
На преподаваньох винєшени податки же Сербия од 2000. по 2011. рок нє вивожела грушки, а остатнї роки присутне звекшанє продукциї, та и вивозу. Медзитим, бишалма ище вше нєдосц заступена на тарґовищу, а ма добру цену.
О продукциї грушкох и бишалмох бешедовали фаховци зоз Сербиї и Италиї, а на сходзе окреме визначоване же сорти треба виберац у складзе з аґроеколоґийнима условиями єдного поднєбя. Тиж, важне хасновац сучасни методи хованя тей овоци, информовац ше о нових, лєпших сортох, правилно отримовац жем, а окреме треба мерковац на квалитет саднїцох, визначовали фаховци.
Под час преподаваня, у голу Польопривредного факултету свойо продукти представяли рижни подприємства хтори ше занїмаю з продукцию и дистрибуцию нашеня, саднїцох, опреми за наводньованє и подобним у овоцарстве.
