НОВИ САД – Церква св. апостолох Петра и Павла у Новим Садзе 6. марца була домашня Шветовому дню молитви и екуменскому стретнуцу „Стань, вежнї свою посцель и ходз!”, на хторим присутних привитал наш епарх кир Георгий Джуджар.
– Привитуєм шицких учашнїкох у молитви и тим Божим слове з Євангелиї. Дзекуєм шицким хтори ше потрудзели пририхтац тот дзень молитви и же ше вєдно модлїме. Господ Исус Христос гварел же є медзи нами кед нас єст вецей – здогаднул владика кир Георгий.
На початку молитву на руским язику шпивали парох новосадски о. Юлиян Рац и дзияк Йовґен Надь. Жени зоз пейцох Церквох, медзи хторима були и грекокатолїкинї Блаженка Хома-Цветкович, Мария Гудак и ш. Єремия, представели символи и державу Зимбабве, бо того року жени з Одбора Шветового дня молитви з тей жеми поволали шицких на молитву. Гудакова и Хома-Цветкович зоз кратку драмску сличку з Євангелиї и упечатлїву сценоґрафию ошвижели традицию тих екуменских стретнуцох.
У своїм уводним слове и бешеди, Мария Парнїцки барз подзековала Грекокатолїцкей Церкви же є добра домашня и обрацела увагу на глїбши змисти виривка з Євангелиї „Стань, вежнї свою посцель и ходз!”, цо подрозумює и нашо анґажованє, подзековносц и славу Богу.
Того току жени ше модлєли на шейсцох язикох – горватским, сербским, мадярским словацким, руским и українским язику. Шицки присутни дали свой милодар и помоц фамелиї у нашей парохиї, а на концу владика и священїки благословели шицких у церкви. Потим у церковней сали було аґапе, цо пририхтали любезни домашнї.
