Того викенду фестивал у Свиднїку, участвую и Коцурци

автор зам
1k Опатрене

СВИДНЇК (СЛОВАЦКА) – У Свиднїку, у Словацкей, того викенду, од 17. по 19. юний будзе отримане 62. Швето култури Русинох-Українцох Словацкей, на хторим у трох дньох буду орґанизовани прейґ петнац рижни културно-уметнїцки програми.

Швето култури того року пошвецене и означованю 60-рочнїци Музею українскей култури Словацкого народного музею, як и 160-рочнїци народзеня и 100-рочнїци шмерци писателя Ивана Франка.

Попри двацец дзецинских и старших ансамблох зоз Словацкей, дзе медзи нїма и професийни Поддуклянски народни ансамбл (ПУНА) з Прешова, на фестивалє у Свиднїку участвую и ансамбли з України и Сербиї, односно КУД „Жатва” з Коцура.

Танєчнїки, Женска шпивацка ґрупа и оркестер „Жатви” на отвореней сцени у Свиднїку наступи на соботу, 18. юния, а дзень пред тим, 17. юния и на локалним фестивалє у Сабинове, нєдалєко од Прешова.

На початку Швета, 17. юния, нащивителє у свиднїцким Доме култури годни опатриц и виставу о Руснацох у Сербиї Заводу за културу войводянских Руснацох, хтора там отворена на тогорочним Русинским фестивалє, 27. мая.

На фестивал до Свиднїку одходзи и делеґация Союзу Руснацох Українцох Сербиї, а поволана и делеґация Националного совиту Руснацох.

Швето култури орґанизую Союз Русинох-Українцох Словацкей, Прешовски самоуправни край, Место Свиднїк и Словацки народни музей-Музей українскей култури.

ПОВЯЗАНИ ТЕКСТИ