УЖГОРОД (УКРАЇНА) – Всоботу, 10. децембра, у 89. року живота у Ужгородзе, у України, умар познати линґвиста, доктор филолоґийних наукох, универзитетски професор Павло Чучка.
Павло Чучка народзени 22. фебруара 1928. року у закарпатским валалє Баранинци. У периодзе од 1941. по 1944. рок школовал ше у ґимназиї у Ужгородзе, вєдно з дзепоєднима нашима тедишнїма школярами, як цо то Святослав Надь, Микола Сеґеди, Иван Бесерминї и други. Седемдзешатих рокох прешлого вику на вецей заводи нащивел своїх колеґох у Войводини и популаризовал наш литературни язик.
По законченю студийох на Ужгородским универзитету, на нїм преподавал од 1954. року, а попри тим же бул порядни професор, шеф Катедри общей и славянскей линґвистики и словацкей филолоґиї, др Чучка на два заводи бул и декан Ужгородского Филозофского факултету. Тиж бул и ментор велїм аспирантом котри здобули званє кандидатох и докторох наукох, медзи нїма и Руснацох з тих просторох.
Професор Чучка обявел вельке число наукових роботох з обласци диялектолоґиї, антрополоґиї и лексиколоґиї. Єдна з його значнєйших роботох ноши наслов „Антропонимия Закарпатя”, дзе обявени презвиска и мена исти, або барз подобни меном и презвиском наших предкох.
Др Павло Чучка Будзе поховани нєшка, 13. децембра, у Ужгородзе.