ВЕРБАС – Штварток, 22. децембра, у просторийох КПД ,,Карпати’” у Вербаше, у орґанизациї КПД ,,Карпати” и Месного одбору Рускей матки (РМ) Вербас отримана проєкция документарного филму ,,Трагедия Галицкей Руси” Алексея Денисова.
Филм о страданю Русинох у Першей шветовей войни перши раз приказани на тогорочним першим „Русин Филм Фесту” у Шидзе, а, на проєкциї було надосц заинтересованих нащивительох.
Як Рутенпрес дознава од предсидателя КПД ,,Карпати” Деяна Загорянския, праве пре вельке интересованє, проєкция филму у Вербаше будзе повторена по наиходзацих шветох, а представителє РМ, медзи нїма и єй предсидатель Дюра Папуґа, исти дзень Вербащаном представели и тогорочни числа глашнїку РМ „Руснак”.
