У Водици благослов за нови школски рок

автор м. афич, н. рамач
410 Опатрене

РУСКИ КЕРЕСТУР – У Марийовим святилїщу Водици, вчера бул Школярски дзень та на 11,30 годзин була дзецинска Служба Божа як молитва за благослов за наступаюци школски рок. Присутни були велї школяре рижних ґенерацийох, студенти, родичи и други вирни.

Службу служел домашнї парох о. Михайло Малацко, споведал о. Янко Колошняї зоз Канади, а Апостол читал школяр Никола Петкович.

У казанї о. Малацко визначел прецо важни тот дзень присц замодлїц Божи благослов у новим школским року. Як гварел, школа почина, алє нє лєм зберанє знаня, алє и школа медзисобних одношеньох, дзе ше шицки уча буц цо лєпше людзе и жиц у правей любови, а теди благослов Божи за нови школски рок сам придзе.

На концу Служби парох пошвецел и школски ташки и шицких присутних, а волонтере пририхтали почасценє.

ПОВЯЗАНИ ТЕКСТИ