РУСКИ КЕРЕСТУР – У Марийовим святилїщу Водици, вчера означени Школярски дзень за школярох и студентох з нагоди початку нового школского року.
Службу Божу, як молитву за Божи благослов за успишни наступаюци школски рок, служел керестурски парох о. Михайло Малацко, споведали капеланє о. Владимир Медєши и о. Михайло Шанта, а Апостол читал школяр Павле Венчельовски.
О. Шанта и наказовал, та у казанї визначел яке важне умножовац и дзелїц свойо таланти зоз другима, а так треба робиц и у своїм школованю.
На концу Служби Божей, на котрей було красне число школярох шицких возростох, парох о. Малацко окончел и благослов-пошвецанє школских ташкох, як и шицких присутних, а по Служби, Каритасово волонтере за шицких пририхтали ошвиженє и закуску.
