РУСКИ КЕРЕСТУР – На ютре у парохиї св. оца Миколая у Руским Керестуре, припада швето Сошествиє св. Духа – Русадля, лєбо Пейдзешатнїца, хторе ше преславює три днї.
Русадля єдно з найвекших хтистиянских шветох, з хторим ше преславює подїю зиходзеня Святого духа на апостолох пейдзешат днї по Исусовим Воскресеню, та ше тота подїя трима и як родзени дзень Церкви Христовей. Символична фарба того швета желєна, так же ше, по нашей традициї, на швето зоз желєнима конарами оквицує церкву и обисца.
На Перши и Други дзень Русадльох служби Божо буду по звичайним розпорядку у Катедралней церкви, на Други дзень по службох и мированє, а Вечарша Служба Божа на Други дзень будзе лєм у Марийовим святилїщу, у Водици, на 19 годзин.
На Треци дзень Русадьох, на вовторок, 17. мая, у нашей церкви и традицийни Завитни дзень у Водици, на хтори того року там буду окремни духовни подїї, а єдна з нїх же у ювилейним Року милосердия будзе одпустове паломнїцтво за вирних зоз шицких парохийох нашого Еґзархату.
Источашнє будзе отримана и шветочносц з нагоди приманя Водици до Шветовей заєднїци Марийових святилїщох Католїцкей церкви, на чолє з церкву Мария Велька у Риме.
На Завитни дзень Архиєрейску Службу Божу з нашим владиком Георгийом будзе предводзиц и апостолски нунций у Сербиї, архиепископ Лучияно Сурияни, и владикове обидвох обрядох з нашей и сушедних жемох.