КУЛА – Школа за основне музичне образованє (ШОМО) з Кули нєшка домашня XII Фестивалу войводянскей тамбури, на хторим ше буду змагац школяре з 10 основних и штреднїх музичних школох у Войводини.
У катеґориї солистох наступя 49 змагателє, як и камерни состави и оркестри зоз школох у Бечею, Вербасу, Панчеве, Кикинди, Руми, Суботици, Ади и Сримскей Митровици. Медзи нїма и штверо школяре Кулскей ШОМО, з котрих двойо з єй керестурского Оддзелєня.
З кулскей Школи на змаганю участвую Иґор Папуґа з другей класи на прим-тамбури и Матей Катрина з трецей класи на бас-прим тамбури, котри у класи наставнїка Милана Суїча, як и Марко Алексич на прим и Дияна Чуде на бас-прим тамбури зоз штвартей класи, котри тамбуру уча при наставнїкови Владимирови Медєшови.
Змаганє солистох у вецей катеґорийох у Концертней сали ШОМО (у Пионирским доме) почина на 9,30, а камерних составох на 16,30 годзин. Шветочни концерт будзе на 18 годзин у Велькей сали Културного центру Кула, на хторим наступя найуспишнєйши змагателє-солисти, а там будзе и змаганє двох оркестрох.