НОВИ САД – Вчера у Новим Садзе почал пияти „Дунайски бизнис форум“, на хторим ше бешедує о можлївосцох сотруднїцтва подунайских державох и заєднїцким унапредзованю Дунайскей стратеґиї.
Сход отворел предсидатель Покраїнскей влади Иґор Мирович, а присуствовали водзаци особи з обласци бизнису, науки, култури, медийох, политичаре, дипломати, та представителє явного живота з Нємецкей, Австриї, Мадярскей, Ческей, Словацкей, Словениї, Горватскей, Босни и Герцеґовини, Сербиї, Чарней Гори, Румуниї, Болгарскей, Молдавиї и України.
– Дунайски бизнис форум одлична нагода за сотруднїцтво явного и приватного сектору, а ми нєшкайши сход дожили як предлуженє успишней приповедки хтору зме започали у сотруднїцтве з Републичну и Покраїнску владу, а огляднєме ше и на вибор Нового Саду за Европску престолнїцу култури (ЕПК). Вредносци хтори промовуєме на тим форуме уткани и до промоциї Городу за ЕПК – гварел городоначалнїк Нового Саду Милош Вучевич.
З тей нагоди орґанизаторе Вучевичови уручели припознанє „Дунайски квет“ у катеґориї „Отворени городи“, хторе Город Нови Сад достал за доприношенє прейґгранїчному сотруднїцтву и витворйованє Дунайскей стратеґиї. Тото припознанє ше кажди рок додзелює поєдинцом и локалним самоуправом за розвой и змоцньованє просперитету Подунавя.
Орґанизаторе Форуму „Медиа Инвент“, Универзитет у Новим Садзе, Институт европских реґионох зоз Салзбурґу и СЕНС зоз Сараєва.