У Руским културним центру у Новим Садзе, концом прешлого року отримана роботня за младих же би ше их упознало зоз структуру и роботу Националного совиту Руснацох, окреме Роботного цела за младеж.
Роботню орґанизовали члени Роботного цела за младеж, Соня Гудак и Иван Канюх, а на нєй були и Хелена Папуґа, членїца Роботного цела, як и Мирослав Кевежди, член Националного совиту Руснацох.
Гудакова и Канюх на нєформални и креативни способ пробовали младим потолковац цо Роботне цело за младеж. Представели структуру Националного совиту, його обовязки и задатки, як и членох и роботу Роботного цела. Роботня була отвореного типу, так же нащивителє мали нагоду активно участвовац и поставяц питаня, алє и дац свойо предкладаня, лєбо зауваги.
– Таки нєформални роботнї можу младим баржей приблїжиц Роботне цело як даяки схадзки лєбо подобне. Думам же млади нє цалком сиґурни цо Национални совит и як функционує, алє то их интересує и сцу о тим вецей научиц – гварели Соня и Иван.
– Акцент роботнї бул на толкованю проєктох. Поволали зме шицких младих же би писали проєкти и же би цо вецей конкуровали. Роботне цело, и ми особнє, вше ту и дзечнє помогнєме – наглашую вони.
Нащивителє були наисце заинтересовани, а Гудакова и Канюх гварели же буду ище таки, лєбо подобни роботнї. По законченю роботнї була музична часц вечара у хторей наступали Саня Полдруги и Кристиян Няради.
Упечатки:
Яна Еделински, Руски Керестур:
Мали зме нагоду дакус вецей чуц о проєктох, а млади нє досц упознати з тоту тему, та думам же и идея и реализация були успишни.
Давид Салаґ, Дюрдьов:
Тота роботня ми помогла. Поправдзе, барз мало сом знал о Роботним целу. Тераз ми шицко яснєйше. Думам же треба же би ше отримовало таки стретнуца. Потримуєм тоту идею.
Иван Емейди, Руски Керестур: Барз ше ми пачи же роботня була информативного характеру и же було интеракциї и комуникациї, а нє преподаванє.
Мирко Пап, Нови Сад:
Чкода же нє було вецей младих. Маме шицко цо нам треба – збуваня, просториї, орґанизаторох, средства информованя, а знова нащивеносц мала. Цо ше дотика роботнї, члени Роботного цела наисце указали намаганє и вельку дзеку и, понеже була перша роботня такого типу, було цалком добре.
