НОВЕ ОРАХОВО – З нагоди Дзецинского тижня, у ОШ „18. октобер” у Новим Орахове вчера, 9. октобра, отримана роботня руского язика, на хторей участвовали школяре з ОШ „Чаки Лайош” з Бачкей Тополї и з домашнєй школи, котри ходза на годзини пестованя руского язика з елементами националней култури.
Роботня була составена з язичних бавискох и задаткох у вязу з руску литературу, а окреме була заступена народна литература, насампредз присловки. Кажди школяр з роботнї дому однєсол и дарунок – означовач за кнїжки, хтори дзеци направели з помоцу своєй наставнїци, а директорка ораховскей Школи Жужана Шавелин Зелеи на концу роботнї школярох почасцела з лакотками.
Школяре ОШ „18. октобер” мали змистови Дзецински идзень, бо кажди дзень була орґанизована даяка активносц.
Пондзелок були бависка без гранїци, вовторок госцовал Дзецински театер, стреду ше отримовало змаганє у столним тенису и у штафетних бавискох, штварток бул турнир у фодбалє за хлапцох и „вратара” за дзивчата, док за нїзши класи орґанизоване ученє народного мадярского танцу.
Попри роботнї руского язика, вчера у ораховскей Школи бул и музични дзень, а треба надпомнуц же програму за Дзецински тидзень предложел Дзецински парламент Школи, а потримала ю Наставнїцка рада.
