РУСКИ КЕРЕСТУР – У парохиї св. оца Миколая вчера вечар бул остатнї дзень Крачунскей дзевятнїци, а нєшка Вилїя по григориянским календаре. Всеночне будзе на 20 годзин место на 23. Наютре Рождество Христово Крачун.
Нєшка на Вилїю рано у церкви Служба Божа Василия Велького и строги пост, а на 17 годзин дзвони оглаша початок Вилїйовей вечери, за хтору ше пририхтує традицийни єдла.
Пре епидемиолоґийну ситуацию препоручене же би дзеци по шпиваню и колядованю ходзели у пополадньових годзинох. Пре исту причину и крачунске Всеночне будзе на 20 годзин зоз почитованьом мирох безпечносци.
Наютре Рождество Христово – Крачун, Служби Божо у церкви по розпорядку як на швето, а то на 8, 10 и 17 годзин. Так исто и на други дзень Крачуна, 26. децембра, а на треци дзень Швета Служби як внєдзелю, та буду на 9, 11,30 и 17 годзин и на шицких будзе и мированє. Шицки богослуженя зоз мирами безпечносци.
