КОЦУР – Церковни одбор грекокатолїцкей церкви Успения пресвятей Богородици у Коцуре вчера, после Велькей Служби Божей, отримал схадзку з парохиянами.
На схадзки коло трицец присутним парохияном члени Церковного одбору, на чолє з др Михайлом Фейсом, представели свою дотерашню єднорочну роботу, кельо тирва їх мандат, а потим бешедоване о будуцих активносцох, насампредз о означованю 250-рочнїци нашей церкви у Коцуре.
– Церковни одбор таку схадзку з парохиянами жадал витвориц насампредз же би ше заєднїцтво нашей парохиї почувствовало нє лєм нука у храме Божим, алє и звонка, у шицких активносцох – виявел за Рутенпрес проф. др Михайло Фейса, предсидатель Церковного одбору.
На схадзки поведзене и же ше Церковни одбор у будучносци будзе закладац за потримовку идеї вибераня женох до Церковного одбору, потримуюци таки поцаг о. Седлака у Петровцох.