ЗАХОДНОБАЧКИ ОКРУГ – Министер просвити Младен Шарчевич вчера нащивел Зомбор, дзе отримал схадзку и з директорами основних и штреднїх школох з местох Заходнобачкого округу, кори му представели реални стан у просвити.
Проблеми з хторима ше просвитни роботнїки у Заходнобачким округу зочую барз вельки, твердза представителє школох, а преноши РТВ. Єден з найзначнєйших то плаци, а попри їх звекшаня, просвитни роботнїки ше закладаю и за платни класи, з хторима би плаци у явним секторе були виєдначенши.
– Нє знам чи у просвити дакеди була чежша ситуация. И ми як директоре, котри зме вяза медзи наставнїками, дзецми и Министерством, хторе нам константно дацо наклада, у барз нєвигодним положеню. За шицко одвитуєме, за шицко зме виновати, шицко у школох маме ми запровадзовац и мотивовац занятих же би робели за шмишну плацу – гварела єдна з учашнїцох на схадзки з министром, директорка Основней школи „Петефи Бриґада” з Кули Ержебет Блашко.
Министер Шарчевич наявел и схадзку зоз синдикатами, дзе вислуха и їх вимоги, а визначел же ше нарок обчекує звекшанє плацох у просвити за 10 одсто.