РУСКИ КЕРЕСТУР – Всоботу, 25. юния, у Руским Керестуре була окреме жалосна подїя, понеже на його остатню драгу випровадзени вчас упокоєни Юлиян Рамач Чамо, єден з найвизначнєйших руских музичарох, композиторох, аранжерох, дириґентох и музичних фаховцох. Юлиян Рамач нєсподзивано, у 53. року живота, умар вноци 24. юния, праве на дзень початку тогорочного Фестивалу рускей култури „Червена ружа”, хтори пре тоту смутну подїю одказани за єшень.
Од Юлияна Рамача Чаму, котри 30 роки робел у Доме култури Руски Керестур як музични сотруднїк и руководитель шицких музичних секцийох, попри його найблїзшей и ширшей фамелиї, одпитали ше шицки аматере и заняти у Доме култури, числени Керестурци, представителє шицких наших институцийох и установох, на чолє з Националним совитом Руснацох, як и представителє шицких КУД-ох з наших местох, та Руснацох з Горватскей.
Випровадзанє Юлияна Рамача почало з комеморативну схадзку на 12 годзин у Велькей сали Дому култури, хтору отворел и на даванє почесци з минуту цихосци упокоєному поволал предсидатель Националного совиту Руснацох Славко Рац. Мишани хор Дому култури и Катедралней церкви св о. Миколая, под руководительством Лидиї Пашовей, одшпивал „Оче наш” и Чамову композицию „Салаши”, а з пригоднима словами, у мено Дому култури и шицких наших институцийох, о Чамови бешедовал Михайло Зазуляк.
До Руского Керестура сцигли и вецей телеграми сочувствия, медзи нїма и од предсидателя Покраїнскей влади Иґора Мировича, хтора и пречитана на комеморативней схадзки.
Досц велька каплїца на керестурским теметове була цесна за шицких котри ше всоботу на 14 годзин жадали остатнї раз одпитац од почитованого и любеного Юлияна Рамача, и спрам нєурядових спознаньох, на хованю було коло 1 000 особи. На його остатню драгу випровадзели го пейцме священїки – керестурски парох о. Михайло Малацко, сримскомитровицки и беоґрадски парох о. Владимир Варґа, коцурски парох о. Владислав Рац, старовербаски парох о. Алексий Гудак и кулски капелан о. Платон Салак, ЧСВВ.
Под час обряду хованя, оркестер Дому култури грал Посмертни марш, Хор шпивал духовни шпиванки и спомнуту композицию „Салаши” (на текст Чамого брата Михала Рамача), од покойного ше и над труну з бешеду одпитал Михайло Зазуляк, у мено оркестру його млади член Александер Планкош пречитал писню хтору, як одпитованє и подзекованє свойому руководительови написал млади поета, тиж член оркестру Жарко Остоїч, як и керестурски парох о. Михайло Малацко.
Числени присутни, з тактами Посмертного маршу, Юлияна Рамача Чаму випровадзели и на його вичне место пребуваня на керестурским теметове.