Шветочно означени Дзень старих особох

автор маф
981 Опатрене

КУЛА – Дзень старих – 1. октобер, вчера означени у Доме за старих и пензионерох Кула, хтори ма Оддзелєнє и у Руским Керестуре. З тей нагоди у Доме у Кули пририхтана традицийна програма за хасновательох обидвох обєктох, котрих тераз єст 86-еро, дзе 23-ойо у Керестуре. Капацитет Дому 105 места.

Програма почала з державну гимну, а домашнїх и госцох привитала нова директорка Дому Сандра Бабич. Вона визначела и тогорочни мото Дня – „Будучносц припада младим и на нїх швет остава, а на старих ше швет отримує”.

Зоз шпиванками и рецитациями наступели школяре кулскей ОШ „Иса Баїч”, а у програми наступели и дзепоєдни хаснователє Дому, котри читали поезию, франти и мудри виреченя. Школяре през мини модну ревию представели и дзепоєдни ручни роботи хасновательох Дому.

На шветочносци були и представителє локалней самоуправи, на чолє з предсидательом Општини Кула и його заменїком Перицом Видеканїчом и Карольом Валком, представителє Центру за социялну роботу и други сотруднїки Дому.

З тоту програму отворени и Мешац старих, понеже октобер пошвецени даваню уваги на найстарших жительох и їх потреби, та и у кулским Доме з тей нагоди планую рижнородни змисти.

ПОВЯЗАНИ ТЕКСТИ