ШАБАЦ/РУСКИ КЕРЕСТУР – Каратисти рускокерестурского „Русину” на Державним першенстве Шотокан карате союзу, хторе внєдзелю, 22. мая отримане у Шабцу, освоєли аж шейсц медалї у своїх катеґорийох цо, як гварел тренер каратистох Михайло Орос – барз добри успих и резултат роботи у єдней сезони.
Други места у поєдинєчних борбох у катеґориї юниоркох освоєли Сара Планчак и Мартина Рац, док Анамария Няради у тей катеґориї у борбох освоєла треце место.
Екипа юниоркох, у хторей попри спомнутих була и Кристина Катона, тиж у борбох освоєла треце место.
Пионирска екипа „Русину” у борбох завжала треце место, а творели ю Ґлориян Штранґар, Теодор Няради и Андрей Дудаш, а у конкуренциї юниорох Даниел Кормош тиж освоєл треце место у поєдинєчних борбох.
Попри спомнутих, з КК „Русин” на Державним першенстве у своїх катеґорийох участвовали и Анастазия Фаркаш и Деян Кормош.