НОВИ САД – У рамикох порядней смотри шицких жимских службох явних комуналних подприємствох (ЯКП) у Новим Садзе, члени Оперативного штабу жимскей служби Городу обишли пункти Жимскей служби ЯКП „Драга“, „Городске желєнїдло“, „Паркинґ сервис“ и „Чистота“ и утвердзели же шицки подприємства цалком порихтани за роботу у жимских условийох.
Член Городскей ради за комунални роботи Владимир Стойкович гварел же, спрам звитох хтори достали, шицки подприємства маю одвитуюцу механїзацию, опрему и людство, та з искуством з прешлих рокох порихтано дочекаю жиму, до чого ше прешвечел и на терену.
За жиму обезпечени 2 800 тони солї за драги, 11 тони маґнезиюму за чисценє мостох, а єст и достаточно дежурни екипи за одметанє шнїгу и отримованє драгох.
Руководитель Жимскей служби ЯКП „Драга“ Ґойко Етински гварел же тота служба на териториї Городу Нови Сад отримує вєдно 800 километери драгох. Аж 22 роботни єдинки анґажовани на сипаню солї, 35 єдинки за одметанє шнїгу, а у случаю позарядовей ситуациї буду активовани шицки капацитети жимских службох на териториї Городу.