РУСКИ КЕРЕСТУР – Основна и штредня школа з домом школярох „Петро Кузмяк” уключена до общого проєкту „Превенция ризику од тарґовини з людзми, дзецми и младима у Сербиї”, а информация о тим винєшена на схадзки Школского одбору (ШО), штварток, 17. новембра.
О уключованю Школи до проєкту, едукациї, та о активносцох вязаних за проєкт членох ШО поинформовала директорка Хелена Пашо Павлович и наглашела же ше проєкт уноши до школских документох и презентує шицким школским орґаном, а нєдавно зоз школярами означени и Европски дзень превенциї того зявеня. З тей нагоди присутни опатрели и едукативни филм о тей теми.
На схадзки ШО винєшене и же Школа достала препоруку же би направела План защити од тероризму, за цо потребне вименїц финансийни план и розписац явну набавку за проєкт, цо ШО потримал.
На схадзки бешедоване и о общим успиху школярох на першим тромешачу, та о актуалносцох коло орґанизованя екскурзийох за школярох.