КОЦУР – Вчера у Основней школи „Братство єдинство” у Коцуре отримана програма у рамикох Културней манифестациї „Костельникова єшень”, на хторей школяром руских оддзелєньох представени три нови кнїжки за дзеци у виданю НВУ „Руске слово”, а була то нагода и за упознаванє з авторками тих нових творох.
Присутних госцох и дзеци привитала директорка Школи Славица Байор, а литературне стретнуце водзел одвичательни редактор Видавательней дїялносци „Руского слова” Микола Шанта.
Школяром од першей по штварту класу представена кнїжки „Котульки и ґомбульки” Ирини Гарди Ковачевич, а на представяню присуствовала и илустраторка тей кнїжки Мария Ковачевич. Старшим школяром, од пиятей по осму класу, представени кнїжки „Гайзибан на шпарґу” Меланиї Римар и „Злагода” Серафини Макаї.
Школяре на програми комуниковали з авторками, а ришуюци загадки, лєбо одвитуюци на питаня, даскельо школяре достали кнїжки. У музичней часци участвовали Танита Ходак и Сашо Палєнкаш з рускима забавнима композициями, а и сами школяре одшивали по єдну шпиванку.