ЯРОСЛАВ СИСАК

Пияток 27. юния у Прешове у Републики Словацкей упокоєл ше ґлумец, режисер, длугорочни директор Театру Александра Духновича, режисер и прекладатель театралних текстох на русински язик Ярослав Сисак. Як сообщене зоз Театру Александра Духновича, а пренєсол Радио лем.фм, Ярослав Сисак бул важна особа у дефинованю характеристикох русинского театра, єден є з сновательох Русинскей оброди у Словацкей после 1989. року, а бул и єй предсидатель. Ярослав Сисак ше народзел 28. мая 1939. року у валалє Пихнє, у округу Снїна. Закончел штредню Педаґоґийну школу у Прешове, а вец ше 1957. року придружел ґу драмскей екипи тедишнього Українского народного театра (УНТ) у Прешове. Сисак бул єден з перших хтори студирал на Театралним институту Карпенко-Кари у Києве, перше ґлуму, а потим режию. Од 1978. до 1982. бул уметнїцки руководитель драмского колектива УНТ, а вец до 1998. року бул театрални режисер. После политичних пременкох у Чехословацкей 1989. року под Сисковим водством дотедишнї театер, у октобре 1990. року постал Русински театер Александра Духновича, у хторим виводзени представи на українским и русинским язику. Окрем того прекладал драмски тексти на русински язик, медзи иншим и драми Дюри Папгаргая, хтори потим обявени у кнїжки: „Театер Александра Духновича у прекладох Ярослава Сисака”, чийо редакторе Валерий Падяк и Михал Павлич. Ярослав Сисак за Руски народни театер „Петро Ризнич Дядя” на сцену поставел два представи: „Агафия, старого попа дзивка” Дюри Папгаргая, 1992. року и „На дну” Максима Горкого, 2002. року. Комеморация Ярославови Сисакови отримана 2. юлия у Доме смутку у Прешове.

В. В.